七月份去咗英國，無去特別搵出名既野食，不過所到既餐廳都有拍照作為紀念，整理好之後就會上傳分享俾大家。
而八月第一篇係一間幾特別既餐廳，名叫The Captain's House，主打西餐及海鮮，其中一款主打菜式係一袋海鮮。
位於18樓既「隊長之屋」環境優美，不過餐廳頗細，坐得幾迫，位置較少，週末及假期晚餐時間分為1800-2030及2030-2300兩個時段，都經常Full Booking及無walk in，所以建議預早訂座。餐廳Logo為一隻可愛卡通龍蝦，證明餐廳賣點亦係龍蝦。
先叫一個前菜黑松露菌薯條，另外有茄汁，兩款醬料任君選擇，薯條炸得脆，而黑松露菌醬味道頗為濃烈，實屬開胃小品。
餐廳主打菜式係呢個海鮮拼盤，$398/$498/$698 可以揀3/5/8款海鮮，今日加一隻龍蝦要加$338，有四款醬汁可以選擇，而小弟就揀咗最普通既檸檬牛油汁。
佢係以一包既形式上菜，入面好似大雜燴咁有揀咗既海鮮同埋配料醬汁。職員會幫忙打開包裝放好，而我地只需負責食。牛油汁味道實在同海鮮非常配襯，扇貝/青口/螺/蜆肉都非常新鮮甜美，惟一差少少既係長腳蟹腳略嫌無咩蟹味，另外值得讚既係黑椒肉腸。而龍蝦一隻係會後上！﹐
龍蝦放低咗俾食客影完相後就會有職員幫忙將龍蝦切開。龍蝦size尚可接受，味道正常，加上牛油汁係一味「穩陣」之選，但欠缺驚喜。
最後仲叫咗一味黑啤羊膝，呢一道菜反而有驚喜，羊肉質鮮嫩，醬汁香氣噗鼻，加上薯蓉口感一流。
總結︰價格不菲，以呢個價錢應該可以食到更新鮮味美既海鮮，不過做法幾特別，第一次食叫到藍包麻包袋感覺有趣，其他西式菜式應該做得唔錯，值得去試一次。
本餐價錢: 每位 $780 (晚飯)
餐廳: The Captain's House
地址: 香港九龍尖沙咀厚福街8號H8 18樓
