首訪流浮山

是日與幾位朋友去完下白泥影相後，去了海鮮天堂流浮山，發現呢個人人都講既地方竟然係小弟第一次去。逛咗一圈後，決定試下米芝蓮推介既明記海鮮酒家。

豉椒炒蟶子味道濃郁，個汁做得出色。

芝士龍蝦伊麵底，龍蝦肉質鮮厚，牛油味重，但芝士味略嫌不足。

小弟最鍾意食既椒鹽瀨尿蝦，選擇既瀨尿蝦當然係大大隻，可惜落既調味料唔太足，蝦既鮮味無被完全帶出，鯉魚門似乎較出色。

豉油王煎大蝦，一道比較簡單既菜式，反而有啲驚喜。

蒜蓉粉絲蒸扇貝，帶子好大粒，少少辣味令成碟好味程度提升唔少。

明記最出名既油鹽焗奄仔，所以表面好油，但唔知係有意定無心，有某啲位置既鹽份非常重，有啲就無咩味，所以一啖咸一啖淡咁。


總結︰海鮮一流 (當然一分錢一分貨)，但餐廳加工唔算特別出色，小弟覺得與價錢相若既鯉魚門比，後者似乎略勝一籌。

本餐價錢: 每位 HKD 676 (晚餐)
地址: 新界流浮山正大街四十號

蛋包飯

係芬蘭試過既餐廳既資料還在整理中，所以最近都未有更新。今日見維園年宵開始，所以趁行之前去天后搵下有咩食。天后近年有好多餐廳新開張，花多眼亂，最後揀咗以下呢間。
 

 見佢電視介紹都係講明太子蛋包飯，一於試下呢個！

呢個蛋包飯最特別之處係全部都係蛋白，上面就有個半生熟蛋黃。裡面除咗飯，仲有帶子同蟹腳，加埋少少醋同明太子係外面，感覺好清，入口好舒服。

而呢個係海膽蛋包飯，流心蛋 (+$18) 配忌廉芝士汁。雖然無試過非流心蛋版本，但想像到會差好遠。少許海膽味同濃烈芝士汁，加埋蛋汁一併送飯，碟飯從未試過咁快就清晒。


總結︰見到午餐同晚餐同價 (午餐多個沙律同飲品)，晚餐尚算幾抵食，不過只限快食，唔可以慢慢坐。

本餐價錢: 每位 HKD 194.5 (晚餐)
地址: 天后清風街3號地下

中環區壽司輕食

今日係中環區想食餐較唔熱氣既晚餐，壽司就即時係腦海中淨出嚟，去咗間試過幾次午餐既餐廳，試試佢既晚餐得唔得。 

壽司喰，英文Sushi Kuu，「喰」一字解作食，即係食壽司

一個人份量既Deluxe壽司，九件壽司加兩件玉子，手握壽司飯少少暖，拖羅、海膽、魚子、油甘魚較出色，蝦同吞拿魚略嫌唔夠新鮮。

總結︰同一般中環餐廳一樣，午餐感覺較抵食，晚餐較貴既價錢係希望食到更新鮮既食品，呢間尚算可以。

本餐價錢: 每位 HKD 462 (晚餐)
地址: 中環威靈頓街2-8號M88 1樓

久違了既更新 --- 魚生飯

最近比較忙，有一段時間無更新blog了，要勤力返啲周圍食野先~

今日行過尖沙咀iSquare，見到一間日式料理貼咗張推廣poster，一個貌似好豐富既雜錦魚生飯只售$98，所以入去試一試。

呢個就係推廣中既"上野鮑魚海鮮丼"，一大隻鮑魚之後，仲有三文魚、吞拿魚、墨魚、蝦、北寄貝、魚子、玉子等等，滿足一眾三心兩意既食客。鮑魚尤其新鮮，其他不過不失。

另外呢個叫高松丼，高松較出名既係烏龍麵，所以唔太知用呢個地方命名既原因。個丼有海膽、厚切油甘魚、魚子、蟹柳，另外仲有一小碗蕎麥麵，魚生唔係太新鮮，不過海膽無異味，價錢$188，還尚算值得食。

總結︰係尖沙咀商場中，價錢唔算太貴，特別推介推廣中既海鮮丼，值得一試。本餐價錢: 每位 HKD 157.30 (晚餐)餐廳: 錦丼地址: 九龍尖沙咀彌敦道63號國際廣場7樓2號鋪

貴價日式鐵板燒

是日小弟生日，女朋友專登帶我去食返餐好野。呢間和三昩位於銅鑼灣Sogo大樓，淨係聽地址都已經知道價格不菲，不過食過後又的確覺得值得。上網Google下，發現呢間前身係千世登，亦係有名既鐵板燒，可惜小弟未能品嘗前身，不能比較，即管用全新角度去睇。

店鋪分開咗兩邊，一邊係鐵板燒，一邊係食魚生之類既料理。生日當然豪一豪佢，叫咗個澳洲鮑魚+佐賀和牛套餐。

先嚟咗個前菜，鰻魚青瓜，開咗個胃，完全等唔切嚟緊既美食。

率先上場既係鵝肝，下面有烘乾咗脆脆地多士配襯，鵝肝煎得略嫌熟咗少少，不過入口溶既口感依然，加埋脆多士簡直一流。

然後就到一大隻鮑魚，先成隻燒一燒，甩咗殼後就切成片狀，份量十足！鮮味充足，就咁落少少黑椒同鹽進食便可。

中間會有小食隔一隔，包括上面既蚌同煎豆腐野菜。

跟住就到清酒煮蜆，煮既時候會著火，觀賞性一流。湯入面酒味好濃烈，若果唔太鍾意酒味既話可能會覺得太嗆。蜆肉鮮甜，小弟頗為接受酒味所以幾鍾意個湯底。

個牛有肥肉，師傅問我地想就咁食定炒飯，我地決定放埋入去炒飯無咁滯。炒飯甘香，牛肥肉同本身豬肉粒都加強咗炒飯口感。

最後當然係重頭戲︰佐賀A4和牛。雖然未到A5級數，但塊牛油脂分佈都幾平均。塊多士係用嚟吸油既，左邊煎乾蒜同右邊係鹽，和牛食落去富有肉汁，牛味濃厚。由於脂肪平均所以唔會好快飽，不過食多幾塊就開始有種滯既感覺。完成咗和牛後鐵板燒正式結束，服務員帶我地到一個咖啡區，飲下野同食甜品，順便解下滯。人數唔太多所以可以慢慢坐，我諗如果人太多個區域就未必夠位。總結︰高質素，特別日子值得去哄下父母或另一半開心，亦見到有人帶客嚟食。呢個套餐份量頗為多，建議飯唔好食咁多，以免到和牛時開始無乜胃口。本餐價錢: 每位 HKD 1298 (晚餐)餐廳: 和三昧地址: 銅鑼灣軒尼斯道555號東角中心22樓

抵食日式吉列餐廳

今次介紹下一間可以以平民價食日本野既餐廳，呢間CaTuYa吉豚屋位於深水埗，係新開既分店，小弟未試過其他分店，不過呢間尚算唔錯。

店鋪裝潢簡單得嚟有啲日本快餐店既味道。

小弟食既時候仲有Facebook活動，有現金卷送。

吉列豬柳同蝦，同吉列豬扒定食，可以揀飯或熱湯烏冬，豬肉唔會炸得乾身，蝦亦感覺新鮮，惟獨係平價餐無得無限任添沙律同飯。

總結: 係深水埗的確唔少平野食，不過較少日本野，呢個價錢食吉列類定食算係幾抵食。

本餐價錢: 每位 HKD 82.5 (晚餐)

餐廳: CaTuYa 吉豚屋
地址: 深水埗汝州街278號地下

七月英國之旅 (七) 正宗英式下午茶

總結︰嚟到英國緊係要試下正宗既英式下午茶，呢間酒店位於一個杳無人煙既地方，需要先預約，到時建議租車或call Uber去。酒店本身好靚，而嗰日有幸見證到一個英式傳統婚禮，男既紳士裝，女既戴上大圓帽。講返個下午茶，份量實在好大，圖片中係五人份量，佢地係預咗你一人叫一份然後由2點傾計到夜晚。好可惜我地要趕飛機所以只能享用大約個半鐘。味道係無容置疑，如果咁啱到Birmingham附近又想試下英式下午茶，絕對推介呢間。

本餐價錢: 每位 GBP 35 (下午茶)

餐廳: Hampton Manor
地址: Shadowbrook Lane, Hampton-in-Arden, Solihull B92 0AE