煩囂市區中把酒談心既好地方

食完飯朋友話想飲杯野, 所以上咗去北京道一號既Aqua Spirit, 上到去有人幫你存放好袋, 等你可以舒服咁享受一下環境, 飲品同尖沙咀既風景

由於環境係全黑, 只有點點燭光同少量射燈, 只能用燭光既微弱燈光影張"意境照"~

窗邊既二人枱係望住尖沙咀境, 最正係室內唔會受天氣影響

如一般酒吧, Aqua都有小食同大量唔同既酒供應. 今次與幾位朋友開咗一支澳洲既紅酒, 以及點咗一個小食拼盤 (有洋葱圈, 薯角, 炸雞肉等), 同埋一碟 Parma Ham+Burrata cheese.

食物方面唔會有太高期望, 主要都係飲野傾計同享受一下場內音樂氣氛. 場內有一位DJ播歌, 另外會有煙霧效果同Laser燈, 燈光既圖案會根據音樂節奏而變化.

總結: 一般cocktail大約百幾蚊一杯, 紅白酒香檳價錢由幾百至幾千一支都有, 任君選擇. Aqua Spirit無疑係一個可以舒舒服服談心既好地方

本餐價錢: 每位 $330 (晚飯後)

餐廳: Aqua Spirit
地址: 尖沙咀北京道1號29樓 (去到reception再上一層先係)

青咖喱不錯既泰式餐廳

今日同幾位朋友去食泰國菜, 適逢下雨天, 友人訂咗一間係寶勒巷既泰式餐廳, 所以要由地鐵站冒住大雨行去. 去到發現其實間餐廳係i-square都開咗間分店, 係可以由地鐵站有蓋直到... 不過因為落雨所以餐廳幾寧靜, 只有數枱食客.

泰式生蝦 - 鮮味足夠, 泰式酸辣汁味道配合, 連埋生蒜食味道一流

泰式豬頸肉肉質略嫌硬, 煮得太熟令到較為乾身, 而且好似最近食到既豬頸肉都較瘦, 口感不好

鮮蝦炒金邊粉, 比較穩陣既一道菜, 只要調味正常味道都唔會太差. 辣粉放係一邊供食客自行調整辣既程度.

辣椒膏炒蟶子. 味道濃郁, 亦有唔少蟶子, 酸得嚟無破壞咗蟶子既鮮味.

是晚晚餐最欣賞既係呢道椰香青咖喱雞, 雞肉較少但青咖喱有非常香既椰子味, 唔會太辣, 叫埋蒜蓉包或白飯一齊食就更加開胃!

總結: 泰式菜一般以酸辣同咖喱為主, 呢間餐廳青咖喱同酸辣汁整得好味, 只係豬頸肉不太推薦

本餐價錢: 每位 $150 (晚餐)

餐廳: 新曼谷泰國菜館
地址: 尖沙咀寶勒巷萬事昌大廈1樓

日本拉麵帝國老臣子

香港近年開創咗個日本拉麵帝國, 豚王算係"開國老臣", 幾年至今仍然人頭湧湧...

係bar枱上面有寫到各款"王"係幾錢~

到點菜時間, 俾張紙你自己配搭, 先揀湯底: 豚王 - 基本豬骨湯, 黑王 - 墨魚汁, 赤王 - 加辣, 翠王 - 橄欖. 而今期既限定王係"山區王". 山區王背後意義大, 但由於太清新, 小弟都係選擇基本豚王, 並選上多醬油, 超濃香味油及多蒜. 另外就係選擇腩肉同加溏心蛋

湯底超級濃, 直頭係稠既, 麵質有彈性, 而腩肉係九成肥膏, 若果多返少少肉就無敵啦. 溏心蛋略嫌過熟, 蛋黃唔夠流質.

總結: 係香港地求其去一間拉麵店都要$80以上, 豚王亦不例外, 但勝在湯底味道濃道, 幾年嚟水準都無乜點差到!

本餐價錢: 每位 $102 (午餐)

餐廳: 豚王

地址: 沙田新城市中心1期1樓167鋪

香港有名既日式燒肉

今日去咗間世界知名的日式燒肉 - 牛角. 小弟已經有一段時間無去, 今次一去有幸食到新款式.

前菜係青瓜墨魚嘴, 標準味道, 驚喜唔大. 酸酸辣辣咁係幾開胃

丹麥雞胸肉 - 平時一聽到雞胸肉都無咩期望, 因為肉質一般比較實而且唔滑. 但呢隻雞胸肉燒出黎肉質嫩滑, 根據簡介 "...絕不使用抗生素式激素, 經燒烤後保持鮮嫩質感..." 絕對無違反商品條例!

壺漬腹胸肉係另一新嘗試, 由於肉一直浸係醬汁當中, 味道非常濃. 不過對於食得較淡既朋友嚟講未必可以接受到.

當然唔少得招牌王樣腹胸肉同上級牛肋肉, 今次揀鹽味牛油同燒肉汁. 記得兩者都唔好燒太耐, 太熟既話肉質會變得太硬. 腹胸肉係熟後即刻掃兩下牛油就入口, 肉汁同牛油味道混合, 好味~

最後係香葱牛舌, 燒既技巧難度頗高, 一般只係燒二三十秒就要食, 所以唔可以分心~

總結: 要食肉食飽既話, 價錢不菲, 如果想平啲不妨叫一碗牛角飯或玉子飯, 一口肉一啖飯都別有一番風味.

本餐價錢: 每位 $270 (晚餐)

餐廳: 牛角日本燒肉專門店
地址: 九龍灣偉業街33號德福廣場二期4樓429號舖

款式多到試唔晒既自助餐

是日母親節, 帶母親去到旺角帝京花月亭食自助餐.

餐廳內部非常大, 人非常多, 好彩有好多款式既食物分散人流, 食物補充亦好有效率, 唔會導致排長龍同無食物既情況出現.

冷盤有鱈場蟹腳, 味道略嫌偏咸, 蓋過本身蟹味.

當然少不了凍蝦同青口, 頗新鮮. 沙律方面亦有不少調味料選擇, 可惜菜既選擇比較少.

餐廳亦有即場開生蠔 (美國太平洋生蠔). 開完後會以過濾水直接沖洗.

Shake Shake雞, 將炸雞粒放入盒中, 加入調味料 (有蕃茄, 咖喱同芥末蜜糖) 搖勻.

連燒味都有, 下圖係火炙壽司, 及師傅旁邊切魚生.

呢個都算係小弟全晚食最多次既食物. 將龍蝦煮熟後, 再鋪上芝士, 用火槍將芝士燒到外脆, 內裡就融入龍蝦肉中. 好味!

而鵝肝亦係現場煎, 不過好睇時間, 如果有幸可以拎到一塊剛煎好既, 必須將刻返埋位進食, 咁樣就會食到"入口即融"既感覺.

最後當然唔少得甜品桌. 各式各樣既蛋糕, tarts, 仲有Movenpick雪糕, 為豐富既母親節晚餐劃上句號.

總結: 作為自助餐, 呢間既賣點可以話係款式多. 味道嚟講不過亦不失, 個人最喜歡既係鵝肝同龍蝦. 甜品就唔駛講, 大部份酒店自助餐都集中火力係甜品. 而母親節既關係, 餐廳亦送咗碗燕窩海皇羹同一個小型芝士蛋糕, 氣氛不俗.

本餐價錢: 每人 $548 (母親節晚餐)

餐廳: 花月亭 La Scala

地址: 旺角太子道西193號帝京酒店2樓

服務親切的日式海鮮燒烤

作為一個華麗開始, 當然係用小弟最鍾意食既海鮮. 今日就去到尖沙咀既焱丸水產食晚飯. 

細細既餐廳, 裝修參考日本居酒屋, 頗有特色, 每枱都有一個燒烤爐供食客使用. 

日式燒烤當然唔少得帆立貝, 又大粒又夠味, 燒完後殼中既係有少許味噌味既湯, 加上帆立貝本身鮮甜味, 令人忍唔住飲晒D湯.

反觀燒蠔唔係太大驚喜, 只係加咗少許調味料, 可能個人比較鍾意食生蠔或者芝士焗蠔之類, 呢間燒蠔味道偏淡.

右下方既係泡菜黑豚肉鍋, 湯底顧名思義係泡菜湯, 味道濃郁. 黑豚肉切得薄, 吸咗泡菜湯更為香口. 

右上方既係店中出名既蟹蓋, 訂枱時已經預留兩件. 蓋內係蟹膏加一隻蛋, 燒烤時要攪勻, 等蛋黃融入蟹膏, 引發膏既鮮味.

最後為飽肚叫咗壽司, 分別係吞拿魚, 油魽魚同甜蝦. 後面係一隻鱈場蟹腳, 份量少價格不菲, 味道尚可但不推薦.

或者你會擔心究竟點燒D海鮮. 唔駛怕, 店中職員會好熱情幫你燒, 尤其係蟹蓋需要係適當既時候將蛋攪勻. 絕對唔駛怕會浪費咗食物.

總結: 餐廳主打既海鮮燒烤味道很好, 海鮮用料不錯, 但係價錢亦較貴而唔飽肚, 無"超抵食"既感覺

本餐價錢: 每人 $450 (晚餐)

餐廳: 焱丸水產

地址: 尖沙咀棉登徑23號華楓大廈地下5&6號鋪