平民米芝蓮印尼菜

今日中午去咗一間位於中環L Place既1968 印尼餐廳，由於一早訂咗位，所以大約十二點半去到唔駛等位就入到去，餐廳大約一點左右坐滿咗人，不過聽到唔少客人都訂咗枱，所以建議都係預先留位。

午餐餐牌有五個選擇，價錢由最平既$98海南雞飯到$158雜錦黃羌飯，論位置及餐廳裝修嚟講，呢個價錢算幾抵食！

Lunch Set包咗一個餐前沙律，麻醬豆腐生菜等等，幾醒胃

友人揀咗椰汁羊肉飯，羊肉質煮得幾淋，椰子香味撲鼻，整個汁連埋飯食令人忍唔住繼續食。

而我就食黃羌雜錦飯，料包括有炸雞，巴東牛肉，酸辣汁蝦，同埋黃羌飯。$158有咁多款野食，特別係隻炸雞，肉質唔會炸到好乾，仲要肉質滑嫩。巴東牛肉既「中東味」好足，牛肉唔會煮得太熟而過硬，亦係好開胃。蝦味道一般，蝦味唔多。黃羌飯有驚喜，飯味中夾雜住羌既香，食落好舒服。

總結︰以如此地理位置有咁既價錢及質素的確唔錯，好適合同幾位同事或朋友食飯傾下計。

本餐價錢: 每位 $160 (晚飯)

餐廳: 印尼餐廳1968
地址: 中環皇后大道中139號The L.Place 5樓

產地直送仲買人

自上次食過俺の割烹，忍唔住再去試另一間日文字為名既餐廳︰目利きの銀次。呢間餐廳係由沖繩來港，以輕鬆居酒屋格調為主，係香港已經有四間分店，分別係銅鑼灣、尖沙咀、屯門及最近期開既旺角店。而今次我係去位於Moko商場既旺角鋪。

餐廳位於商場三樓，門口裝修得頗為豪華，即使係商場另一邊行緊街都會被其門面吸引到。晚飯時間係下午六點開始，五點四十分左右已經見到有人龍排隊，如果可以既建議先打電話訂枱。銀次其中一個賣點係「產地直送仲買人」，食材係由產地日本直送嚟香港。

內部裝修係以居酒屋及木桶為主題，因為淺啡色會令到餐廳好光猛，而且容納到既人數不少，較為熱鬧，與一般暗及靜既居酒屋有些少分別。

有兩三張枱係圓木桶設計，一家人四五個圍住一齊食飯特別溫暖。

日本蛤蜊清酒煮，蛤蜊新鮮清甜，可惜湯底唔太感覺到清酒味，反而有濃濃既牛油味，雖然味道都係不俗，但比起預期會有出入。

燒雞中翼同煙肉鵪春蛋卷，兩者都係選擇咗鹽燒，雞翼味道正常，煙肉鵪春蛋卷我第一次試，口感有驚喜，配合得非常好。

餐廳其中一個重點推介食品︰海膽汁燒蠔。蠔先燒到外膽，然後淋上海膽汁，用鐵板上菜，海膽汁係鐵板上"滋滋"聲，非常吸引。食落味道有點過咸，令到蠔味銳減，而且唔係太食到"海膽"既味。可取之處係蠔燒得好脆，口感唔錯。

軟殼蟹天婦羅，兩隻大大既軟殼蟹，中間充滿蟹肉及蟹膏，不過稍為多咗少少炸粉，物別係蟹腳部份，但整體而言都炸得出色，蟹味足夠。

最後主食係海膽三文魚籽帆立貝魚生飯，三款刺身毫無疑問都好有鮮味，特別係三文魚籽，配合壽司飯食特別新鮮。另外要讚既係山葵，完全係點綴咗成個魚生飯。

總結︰食材新鮮呢一點係無容置疑，價錢方面唔算特別吸引，性價比感覺不太高，只值得試下食一次兩次。

本餐價錢: 每位 $315 (晚飯)

餐廳: 目利きの銀次
地址: 旺角新世紀廣場3樓367號舗

受街坊歡迎既日式料理

今日係荃灣搵地方食晚飯既時候，見到一間小小既日式料理餐廳入面接近坐滿晒人，而旁邊幾間餐廳都係門可羅雀，所以不禁走埋入去趁下熱鬧，順便體驗下呢間餐廳吸引之處。

晚飯時間，有唔少晚市套餐，包括壽司、刺身、定食同鍋物等，價錢都係大約50-90左右，相信價錢平民係其中一個賣點。

汁燒和牛粒便當，便當包括三文魚生菜沙律、章魚燒、面豉湯同白飯，成個便當$62，另外加5蚊有一杯凍飲。味道方面，三文魚食落正常，章魚燒裡面料(章魚)較少但整體味道都尚算唔錯，汁燒和牛就略嫌太熟，配落白飯到要稍為用力少少咀嚼。

鵝肝和牛粒石頭飯，包埋一個玉子燒，價錢$70，一樣加5蚊有一杯凍飲。和牛一樣稍為熟，個飯燒得好香，汁融入咗係飯入面，但石頭鍋唔算太熱，所以入口時飯都有些少凍。

總結︰雖然味道唔係有大驚喜，但性價比嚟講算好好，而且埋單時先發現原來唔收加一，店員服務態度亦唔算差，難怪有唔少街坊幫襯！

本餐價錢: 每位 $72 (晚飯)

餐廳: 意壽司
地址: 荃灣海壩街26號地下

日式平民米芝蓮餐廳

經朋友高度推介，今日中午去到一間位於蘭桂芳，最近較熱門既日本平民米芝蓮餐廳 --- 俺の割烹。大約十二點半到，幸好唔需要等位就有一張二人枱，隨後既食客就要排隊了。餐廳入面有坐位同立食區，立食區現時有特價牛肉火鍋，但由於只係行上去餐廳已經大汗淋漓，所以都係選擇坐位。

午餐Menu選擇頗多，熟食有銀鱈魚西京燒，冷食有刺身或海鮮丼等，被個名吸引咗所以選擇海鮮丼定食。

最先嚟既係一個沙律，生菜加上粟米片同少量千島醬，粟米片脆脆地，配埋生菜既爽口感，係幾有趣既配搭，不過個人唔太喜歡。

一個定食既份量都幾大，有麵豉湯，前菜，茶碗蒸蛋同主菜海鮮丼。前菜方面普普通通，麵豉湯味道較淡。

主菜海鮮丼份量十足，有既刺身包括三文魚、帶子、蝦、海膽、吞拿魚、鱆紅魚、蟹肉等等，Menu上食話"Daily fresh sashimi"所以有可能會有唔同刺身。食嚟口當然無好貴價既魚生新鮮，但都食唔出雪味，魚味幾強，特別係鱆紅魚較出色，以呢個價錢嚟講算係好好食！

結論︰呢間平民米芝蓮有時間就建議快啲去試下，再慢慢累積人氣後可能需要更長等位時間。聽聞晚餐大約要$800一位，我未試過但感覺唔抵，所以都係趁午餐時間試下！

本餐價錢: 每位 $308 (午飯)

餐廳︰ 俺の割烹 Ore-no Kappou by Ginza Okamoto
地址︰ 中環蘭桂芳德己立街32號加州大廈6樓

可以一試既心太軟

今日考完一整日既試, 好想搵個比較人少寧靜既地方, 結果去咗Elements呢個一般只有富戶或電影迷先到既商場. 而露天平台Civic Square中都有唔少酒吧餐廳, 環境氣氛都不俗. 而小弟晚餐就去咗其中一間.

內裡其實就係普通Bar既裝修, 食飯既時候有不少人係度Happy Hour, 亦有幾枱一家大細食晚飯, 氣氛舒適

小小既天窗, 餐廳有二樓, 曾經係窗口見到有人行過, 上面應該係一個平台俾二樓既食客出外

Cajun Chicken Wings, 用Cajun香料醃雞翼, 不過香料分量唔太夠, 一般食Cajun都係味道特別濃烈, 今次感覺似食普通炸雞翼. 另外醬汁係酸酸辣辣, 點完有點似食Buffalo Wings

Carbonara係我最鍾意食既Pasta, 自從有一次係意大利米蘭食過一碟好好味既Carbonara後就經常到處食. 今次呢碟個汁整得夠濃夠稠, 不過我始終鍾意食重蛋黃味.

12oz 牛扒. 叫咗medium rare但入面似乎係medium. 雖然熟咗少少, 但係肉汁依舊, 肉質亦鮮嫩. 薯條都係熱上, 唔錯

最後試埋傳聞中出名既心太軟. 用一個小小既"煲仔"上, 可以保存蛋糕既熱度, 但亦因為咁樣上面舊雪糕溶得好快, 影兩個張就要即刻品嘗. 裡面流心朱古力特別多, 蛋糕做得鬆軟, 加埋溶咗既雪糕, 一凍一熱咁配合得天衣無縫. 不愧為出名甜品.

結論: 心太軟一定要試下. 主菜方面比較唔突出, 價錢不太便宜, 或者去bar都係飲酒食下snacks比較適合.

本餐價錢: 每位 $388 (晚飯)

餐廳: Grand Central Bar & Grill
地址: 尖沙咀柯士甸道西1號圓方(Elements)3樓平台R001號舖